Хабарҳо

Ғолибияти донишҷӯёни ДМИТ дар «Ҷоми академияи илмҳои Тоҷикистон»

Бо мақсади баланд бардоштани шавқу ҳаваси донишҷӯёни муассисаҳои таҳсилоти олии касбӣ ба омӯзиши илмҳои муосир, ташаккули тафаккури илмӣ ва техникии онҳо, инчунин дарёфти донишҷӯёни лаёқатманд ҷиҳати ҷалби онҳо ба соҳаҳои илм рӯзҳои 15-16-уми марти соли равон дар Академияи илмҳои Тоҷикистон олимпиадаи донишҷӯён барои дарёфти «Ҷоми Академияи илмҳои Тоҷикистон» баргузор гардид. 
Дар олимпиадаи мазкур донишҷӯёни зинаи бакалавр ва мутахассиси курсҳои 1-5-уми муассисаҳои таҳсилоти олии касбӣ аз рӯи илмҳои математика, физика, астрономия, химия, геология, биология, иқтисодиёт, технологияҳои иттилоотӣ, забон ва адабиёти тоҷик, таърих, фалсафа, ҳуқуқ ва сиёсатшиносӣ иштирок карданд. 
Аз Донишкадаи молия ва иқтисоди Тоҷикистон 13 нафар донишҷӯ барои иштирок дар ин озмун сафарбар гардида, аз онҳо Самадов Ҷалолиддин, донишҷӯи курси 1-уми факултети менеҷмент ва ҳуқуқи молиявӣ аз фанни таърихи халқи тоҷик (роҳбари илмӣ Муллоҷонов А.К.) сазовори ҷойи дуюм ва Файзов Алиакбар, донишҷӯи курси 3-юми факултети менеҷмент ва ҳуқуқи молиявӣ аз фанни ҳуқуқ (роҳбари илмӣ Қодиров З.) сазовори ҷойи сеюм гардиданд. 
Инчунин барои иштироки фаъол дар озмуни мазкур Ҷӯраева Олтиной, донишҷӯи курси 1-уми факултети молия ва қарз аз фанни математика (роҳбари илмӣ Маханов Р.), Азизова Азиза, донишҷӯи курси 3-юми факултети технологияҳои иттилоотӣ дар иқтисодиёт аз фанни технологияҳои иттилоотӣ (роҳбари илмӣ Воҳидов У.) ва Тошматова Хосият, донишҷӯи курси 1-уми факултети ҳисобдорӣ ва омор аз фанни астрономия (роҳбари илмӣ Орифҷоновна В.) бо Ифтихорномаҳои АИҶТ ва институтҳои он қадрдонӣ гардиданд. 

Қутбиддин Муқимов, сардори раёсати илм ва инноватсия