Хабарҳо

Комёбии навбатии варзишгарони мо

Донишҷӯи курси 3, ихтисоси хадамоти гумруки факултети МИБ Зафар Алиев дар мусобиқаи кушоди шахсӣ-даставӣ оид ба гӯштини «Самбо» байни кормандони мақомоти ҳифзи ҳуқуқ, сохторҳои қудратӣ ва дигар корхонаю идораҳои давлатии Ҷумҳурии Тоҷикистон барои дарёфти ҷоизаи устоди шоистаи варзиш, корманди шоистаи ҷумҳурӣ, полковники мустаъфӣ Маҳмадрасул Саймаҳмудов иштирок намуда, дар вазни 62 кг сазовори ҷойи аввал гардид. Ин донишҷӯ бо 6 нафар ба муҳориба баромада, дастболо гардид. Ҳамин тариқ ба гирифтани медали тилло ва туҳфаи хотиравӣ сазовор гашт. 
Устоди ӯ Муҳаммад Саидов ва Ибодулло Айниддинов мебошанд, ки дар кафедраи варзиш ва мудофиаи граждании донишгоҳ фаъолият мебаранд. 
Мавриди зикр аст, ки донишҷӯи мо қаблан низ дар чандин мусобиқаҳои варзишии сатҳи ҷумҳуриявӣ ва байналхалқӣ иштирок намуда, сазовори ҷойҳои намоён гаштааст. Пас аз чанде баргузории Спортакиадаи ҷумҳуриявии донишҷӯён байни муассисаҳои таҳсилоти олии касбии кишвар доир мегардад ва З. Алиев ҳоло барои иштирок дар ин чорабинӣ омодагӣ мебинад. Инчунин иштироки тахминан 10 нафар донишҷӯёни варзишгари ДДМИТ дар ин чорабинии бонуфузи варзишӣ дар назар дошта шудааст. Мо ба ин комёбӣ Зафарро таҳният намуда, дар сабқатҳои минбаъда барояш барору муваффақиятҳо таманно дорем. 

Насрулло Тӯйчизода