Хабарҳо

Ду дипломи Мадасан аз Ош

Мадасан Ашрафхонов, донишҷӯи курси 3-юми факултети МИБ, ихтисоси хадамоти гумрук ин навбат низ дар мусобиқаҳои байналмилалии варзишӣ иштирок намуда, сазовори ҷойи аввал гардид. 
Аз 22 то 23 сентябри соли ҷорӣ дар шаҳри Оши Ҷумҳурии Қирғизистон бо ташаббуси Кумитаи тарбияи ҷисмонӣ ва варзиши шаҳри Ош мусобиқаи бйналмилалӣ оид ба гӯштини тарзи озод баргузор гардид. Дар он намояндагони кишварҳои Осиёи Марказӣ- Қазоқистону Қирғизистон ва Тоҷикистону Ӯзбекистон ширкат варзиданд. 
Кишвари моро дастаи 12-нафараи варзишгарон муаррифӣ намуданд. Боиси ифтихор аст, ки Мадасан дар вазни 71 кг баромад намуда, чор нафар ҳарифи худро мағлуб намуд. Дар даври финалӣ рақобати ӯ бо варзишгари қирғизистонӣ сурат гирифт, ки дар натиҷа бо нишондоди 10 бар 0 ғолибияти мутлақ насиби Мадасан гардид. 
Инчунин, санаи 18-22 октябри соли равон боз ҳам дар шаҳри Ош мусобиқаи байналмилалии варзишӣ дар байни калонсолон доир гардид. Дар он сабқат низ ба М. Ашрафхонов муяссар шуд, ки бо мағлуб намудани ҳарифони худ аз кишварҳои ҳамсоя сазовори диплом барои ҷойи якум ва медал гардад. 
Маврид ба ёдоварист, ки Мадасан дастпарвари мактаби ҷумҳуриявии маҳорати олии варзишӣ буда, 8 сол мешавад, ки ба намуди варзиши гӯштини тарзи озод машғул аст. Устоди варзиши ҷумҳурӣ буда, пайваста барои такмили маҳорати худ тамрин менамояд. 

Насрулло Тӯйчизода