Хабарҳо
Раёсат соҳиби «Ҷоми ректор»-и ДДМИТ шуд
Бо мақсади тарғибу ташвиқи тарзи ҳаёти солим ва оммавӣ гардонидани варзиш дар миёни устодону кормандони сохторҳои донишгоҳ мусобиқаи футболи хурд барои дарёфти «Ҷоми ректор»-и Донишгоҳи давлатии молия ва иқтисоди Тоҷикистон бахшида ба Рӯзи Президент ва кушодашавии чархаи 1-уми НБО-и Роғун таҳти шиори «Варзиш гарави саломатӣ» дар сатҳи баланд ва хотирмон гузаронида шуд. Мусобиқа миёни 8 дастаи устодону кормандон аз 1-ум то 13-уми ноябри равон дар майдончаи варзишии назди донишгоҳ баргузор гардид.
Санаи 14-уми ноябр дар чорабинии фарҳангӣ-фароғатии бахшида ба Рӯзи Президент ва кушодашавии чархаи 1-уми НБО-и Роғун бо иштироки ректори донишгоҳ Шукрулло Хайрзода ва муовини вазири молияи Ҷумҳурии Тоҷикистон Ҷамшед Нурмаҳмадиён бо мақсади қадрдонӣ намудани беҳтарин дастаҳои варзишии устодону кормандони донишгоҳ, ки дар мусобиқаи варзишӣ аз намуди футболи хурд сазовори ҷойҳои ифтихорӣ гардидаанд, бо мукофотҳои хотиравӣ ва пулӣ сарфароз гардонида шуданд:
Ҷойи якум, Дипломи дараҷаи I, Ҷоми ректори Донишгоҳи давлатии молия ва иқтисоди Тоҷикистон ва маблағи як ҳазору панҷсад (1500) сомонӣ ба дастаи Раёсати донишгоҳ.
Ҷойи дуюм, Дипломи дараҷаи II ва маблағи ҳазор (1000) сомонӣ ба дастаи факултети иқтисод ва бизнес.
Ҷойи сеюм, Дипломи дараҷаи III ва маблағи панҷсад (500) сомонӣ ба дастаи факултети ҳисобдорӣ ва омор.
Инчунин дар асоси хулосаи ҳайати ҳакамон аз миёни дастаҳои варзишӣ беҳтарин бозингарон шахсони зерин дониста шуданд:
Дарвозабони беҳтарин аз дастаи раёсат Носирзода Ҳусейн.
Ҳимоятгари беҳтарин аз дастаи раёсат Хоҷаев Даврон.
Муаллифи голи беҳтарин аз дастаи раёсат Очилдиев Шавкат.
Нишонзани беҳтарин, муаллифи 12 гол аз дастаи факултети иқтисод ва бизнес Аҳмадов Салим.
Беҳтарин бозингар аз дастаи факултети ҳисобдорӣ ва омор Аҳадов Исматулло.
Довари беҳтарин дар мусобиқаи варзишӣ муаллими калони кафедраи тарбияи ҷисмонӣ ва мудофиаи гражданӣ Шокиров Собир Ҷобирович дониста шуд.
Ҳамин тавр, ташкили мусобиқаҳои варзишӣ байни устодону кормандон ва донишҷӯён барои тарғиби тарзи ҳаёти солим ва оммавигардонии варзиш пешбинӣ гардидааст, пайваста дар донишгоҳ гузаронида мешавад.
Нуралӣ Раҳимзода
