Хабарҳо

Вазъи имрӯзаи бозори коғазҳои қиматнок

15 декабри соли равон курси навбатӣ барои сардорону мудирони бахшу шуъбаҳои дастгоҳи марказии Вазорати молияи Ҷумҳурии Тоҷикистон доир гардид, ки он ба мавзӯи «Вазъи имрӯзаи бозори коғазҳои қиматнок ва дурнамои он» бахшида шуд. Онро Б. Сафаров, муовини ректор оид ба илми донишгоҳ ифтитоҳ намуда, кормандони вазоратро аз номи раёсати донишгоҳ ба ин даргоҳи илму маърифат хайрамақдам гуфт. Зикр гардид, ки таъмини муносибатҳои нави молиявию иқтисодӣ, пеш аз ҳама, аз сармоягузорӣ ва рушди бозори коғазҳои қиматнок вобаста аст. 
Фурқат Элов - садори шуъбаи рушди Агентии коғазҳои қиматнок ва бақайдгирии махсусгардонидашудаи Вазорати молияи Ҷумҳурии Тоҷикистон доир ба вазъи имрӯзаи рушди бозори коғазҳои қиматнок дар кишвар иттилоъ дод. Қайд гардид, ки бозори коғазҳои қиматнок яке аз самтҳои муҳими сиёсати иқтисодии мамлакат буда, барои рушду такмили он пайваста тадбирҳо андешида мешавад. Аз ҷониби Ҳукумати Ҷумҳурии Тоҷикистон ҳанӯз солҳои аввали ба даст овардани Истиқлолияти давлатӣ, қонунҳои танзимкунанда қабул гашта буданд, ки барои такони ин соҳа мусоидат намуданд. Ин имкон дод, ки раванди хусусигардонии корхонаю муассисаҳо, рушди бахши хусусӣ заминаи мусоид фароҳам ояд. Бо мақсади рушди ин соҳа, Вазорати молия сохтори алоҳида - Агентии коғазҳои қиматнок ва бақайдгирии махсусгардонидашударо таъсис додааст. 
- Имрӯз ба муомилот баровардани коғазҳои қиматнок ба яке аз самтҳои фаъолияти Вазорати молияи кишвар мубаддал гашта, яке аз дастовардҳои муҳими кишвар мебошад, - афзуд Ф. Элов. 
Дар фарҷоми чорабинӣ иштирокчиёну мутахассисон доир ба ин мавзӯъ андешаҳои худро баён намуданд. 

Насрулло Тӯйчизода