Хабарҳо

Сессияи зимистона чӣ тавр ҷараён дорад?

Мутобиқи талаботи «Тартиб ва ташкили раванди сессияи имтиҳонӣ дар муассисаҳои таҳсилоти олии касбии Ҷумҳурии Тоҷикистон дар низоми кредитии таҳсилот» оид ба тартиби ташкил ва гузаронидани сессияи имтиҳонии зимистонаи соли таҳсили 2018-2019 барои донишҷӯён ва магистрантони шуъбаи рӯзона Фармоиши ректори ДДМИТ аз 29-уми ноябри соли 2018 ба имзо расидааст. Тибқи он давраи баргузории сессияи имтиҳоноти нимсолаи якуми соли таҳсили 2018-2019 аз 28.12.2018 то 18.01.2019 муқаррар шудааст. 
Чӣ тавре, ки Асомиддин Қаландаров- сардори раёсати таълими донишгоҳ иттилоъ дод, вобаста ба назорати сессияи зимистона ва бо мақсади шаффоф ва дар сатҳи баланд гузаронидани имтиҳонҳои ҷорӣ бо фармоиши ректор ситоди корӣ таъсис дода шудааст. Маврид ба зикр аст, ки айни замон дар донишгоҳ 7637 нафар донишҷӯ дар бахшҳои рӯзона ва ғоибона таҳсил менамоянд. Аз ин шумора 4818 нафар дар шакли таҳсили рӯзона ва 2819 нафар дар шакли таҳсили ғоибона, маълумоти дуюм ва таҳсилоти фосилавӣ ба тадрис фаро гирифта шудаанд. 
Дар рӯзи аввалини имтиҳонот, 28-уми декабр 884 нафар аз факултети молия ва қарз, 605 нафар аз факултети иқтисод ва бизнес ва 769 нафар аз факултети менеҷмент ва ҳуқуқи иқтисодӣ имтиҳон супориданд. Имрӯзҳо сессияҳои зимистона дар се маркази тестӣ, марказҳои тестии бинои № 4 (184 ҷойи нишаст) ва маркази тестии бинои № 3 (75 ҷойи нишаст) ҷараён дорад. 

Насрулло Тӯйчизода