Хабарҳо

Аз муаллимони ҷавон имтиҳон гирифта шуд

Чанде пеш бо мақсади боло бурдани дараҷаи дониши педагогӣ, малака ва маҳорати касбии омӯзгорон дар донишгоҳ барои муаллимони ҷавону камтаҷриба курси омӯзишии «Такмили малакаю маҳорати педагогии омӯзгорон» (рӯзҳои 21 - 26 январи соли 2019) гузаронида шуд. Инак, пас аз ҷамъбаст, рӯзи 26 январи соли равон барои омӯзгорони ҷавон - шунавандагони курси мазкур имтиҳон баргузор гардид. 
Тавре зикр рафт, ба курси омӯзишӣ ассистентҳои навкор, камтаҷриба, ҳамчунин собиқадор, фаро гирифта шуда буданд ва ҳар кадом бо мақсади рафъ намудани камбудиҳо дар дарсҳо, мушкилиҳо дар раванди таълим, билохира, муваффақ шудан дар кори таълиму тарбия ва дар сатҳи зарурӣ омодасозии мутахассисони оянда фаъолмандӣ нишон доданд. 
Имтиҳон дар ҳузури номзади илмҳои педагогӣ, дотсент Саъдулло Носиров, сардори раёсати таълим Қаландаров А., сардори шуъбаи мониторинг ва идораи сифати таълим Холбобоев Р. оғоз ёфт ва дар ҷараёни қабули имтиҳон сармутахассиси ҳамин шуъба Шарипов Н. низ иштирок дошт. Дар натиҷа, 28 нафар муаллими ҷавон бомуваффақият имтиҳон супориданд ва баргузории он воқеӣ ва шаффоф сурат гирифт. 
Бояд гуфт, ки ҳамасола бо ташаббуси раёсати ДДМИТ курсҳои такмили ихтисос барои омӯзгорони ҷавон пайваста дар донишгоҳ ташкил карда шуда, он барои баланд бардоштани савияи дониш, малака, маҳорати касбӣ ва салоҳитнокии омӯзгорони ҷавон ба роҳ монда мешавад. 

М. Абдуллоева