Хабарҳо

Такмили ихтисоси омӯзгорони ҷавон

Дар ҳошияи Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар мавриди такмили ихтисоси омӯзгорон роҳбарияти Донишгоҳи давлатии молия ва иқтисоди Тоҷикистон тасмим гирифтааст, ки давра ба давра курсҳои такмили ихтисоси омӯзгоронро ба роҳ монад. 
Вобаста ба ин аз 25-уми декабри соли 2018 то 24-уми январи соли 2019 баҳри баланд бардоштани сатҳи таълим ва самаранокии кор дар раванди гузаронидани тадқиқотҳои илмии омӯзгорони ҷавон дар якҷоягӣ бо Академияи менеҷерон ва бизнес «САМО» курси омӯзишӣ дар мавзӯи «Методҳои инноватсионии таълим ва асосҳои тадқиқоти илмӣ барои омӯзгорони ҷавон» ташкил карда шуд. 
Дар курсҳо 31 нафар омӯзгорони ҷавони ДДМИТ аз кафедраҳои тахассусӣ иштирок доштанд. Машғулиятҳоро профессорон Бозоров Шавкат, Аброр Мирсаидов, Лутфулло Саидмуродов, Шариф Раҳимзода, бизнес-тренер Ифтихор Азимов ва дотсентон Н.Ғафуров ва Баҳром Сафаров гузарониданд. 
Дар машғулиятҳо асосан тарзи дурусти омода кардани корҳои илмию тадқиқотӣ, таҳияи мақолаҳои илмӣ, истифодаи шаклҳои инноватсионии таълим ва дигар масъалаҳои марбут ба сифати таълим мавриди омӯзиш қарор гирифтанд. 
Ҳадафи курс ҷоринамоии методҳои инноватсионӣ дар таълим дар таҷрибаи омӯзгорони ҷавон ва азхуднамоии асосҳои тадқиқотҳои илмӣ мебошад. 
Ҳамин тавр, рӯзи 13 феврали соли равон курси мазкур ҷамъбаст гардида, ба иштирокчиёни он аз тарафи Сафаров Б., муовини ректор оид ба илми донишгоҳ ва раиси Ассотсиатсияи миллии менеҷерон ва маркетингшиносон, профессор Бозоров Ш. сертификат супорида шуд. 
Раёсати донишгоҳ дар оянда низ ташкили ин қабил курсҳоро барои такмили ихтисоси омӯзгорони ҷавон дар назар дорад.