Хабарҳо
Таҷлили Рӯзи Ҷавонон дар факулта
Санаи 21 майи соли равон дар доираи моҳвораи ҷавонон ба ифтихори таҷлили Рӯзи ҷавонони Тоҷикистон дар толори конфронсӣ бо иштироки донишҷӯёни факултети менеҷмент ва ҳуқуқи иқтисодӣ таҳти унвони «Ҷавонон ояндасози миллатанд» ҷамъомади бошукуҳ баргузор гардид. Дар ҷамъомад намояндагон аз раёсати илм ва инноватсия, тарбия, шуъбаи ҷавонон ва омӯзгорону донишҷӯёни факултет иштирок намуданд.
Чорабинии сиёсию фарҳангиро бо сухани ифтитоҳӣ декани факултет Даврон Хоҷазода кушода, дар бораи сиёсати ҷавонон андешаронӣ намуда, ҷавононро ояндаи миллат ва қувваи пешбарандаи ҷомеа номид. Мавсуф дар баромади худ аз дастовардҳои факултет ёдовар шуда, онҳоро дар пешрафти илму техника ва таҳкими пояҳои истиқлоли давлатӣ ва омодасозии мутахассисони баландихтисоси соҳаи иқтисодиёт ва ҳуқуқ муҳим арзёбӣ кард.
Декан аз ғолибияти донишҷӯёни факултет дар олимпиадаву озмунҳои ҷумҳуриявӣ ва байналмилалӣ, шумораи гирандагони стипендияҳои сатҳи гуногун, иштироки онҳо дар корҳои ҷамъиятӣ ва дигар корҳои анҷомёфта ёдовар шуда, онро натиҷаи фаъолияти пурсамари аҳли коллективи меҳнатии факултет ва иттиҳоду сарҷамъии онҳо маънидод кард.
Е.Мирзоева, сардори раёсати илм ва инноватсия, А. Давлатзода, сардори раёсати тарбия ва Ф.Саидов, сардори шуъбаи ҷавонони донишгоҳ дар чорабинии мазкур баромад намуданд.
Дар идома Д. Хоҷазода ҳозиринро бо Рӯзи ҷавонон муборакбод гуфта, таҷлили онро далели таваҷҷуҳу эътибори Ҳукумати мамлакат ва Пешвои муаззами миллат муҳтарам Эмомалӣ Раҳмон қарор гирифтани ҷавонон донист. Албатта, ин дастгирию боварӣ ҷавононро водор месозад, ки дар руҳияи баланди худшиносии миллӣ, ватандӯстӣ, поквиҷдонӣ, эҳтиром ба арзишҳои миллӣ ва зиракии сиёсӣ ба камол расида, ҳамеша дар пайи такмили сатҳи донишу ҷаҳонбинӣ ва малакаи хеш бошанд.
Дар давоми чорабинӣ аз ҷониби садорати факултет ба бархе аз сардорони сохторҳои донишгоҳ ва донишҷӯён А.Давлатзода, Е. Мирзоева, Ф. Саидов, М. Неъматулло, Ҳ. Носиров, Ф. Раҳимзода, Қ. Ҳамидов ва М. Мирзоев барои ҳамкории судманд дар самти татбиқи сиёсати давлатии ҷавонон ва омода намудани мутахассисони баландихтисос ва барои иштироки фаъолона дар корҳои ҷамъиятӣ, озмунҳою олимпиадаҳои дохилидонишгоҳӣ, ҷумҳуриявӣ ва байналмилалӣ бахшида ба Рӯзи ҷавонони Тоҷикистон дар фазои тантанавӣ Ифтихорнома супорида шуд.
Тағоймурод Эшзода
