Факултети муносибатҳои иқтисодии байналмилалӣ

Кафедраҳои факултет

• Иқтисодиёти ҷаҳонӣ
• Муносибатҳои молиявӣ-қарзии байналхалқӣ
• Фаъолияти гумрукӣ

Маълумот дар бораи факултет

Факултети муносибатҳои иқтисодии байналмилалии Донишгоҳи давлатии молия ва иқтисоди Тоҷикистон бо қарори Шӯрои олимони собиқ Донишкадаи молия ва иқтисоди Тоҷикистон таҳти №56/И аз 26.06.2012 сол «Оиди таъсиси факултетҳо ва кафедраҳои Донишкадаи молия ва иқтисоди Тоҷикистон» таъсис дода шуда, дар нимсолаи якуми соли таҳсили 2012-2013 ба фаъолияти худ шурӯъ намудааст. 

Бо фармони ректори Донишгоҳи давлатии молия ва иқтисоди Тоҷикистон муҳтарам Абдуалимзода Ҳакимбек Абдуалим аз соли 2023 роҳбарии факултетро н.и.и., дотсент Убайдов Фахриддин Сайфиддинович ба ӯҳда доранд. 

Дар факултети муносибатҳои иқтисодии байналмилалӣ кафедраҳои зерин амал мекунанд;
1. кафедраи муносибатҳои молиявӣ-қарзии байналхалқӣ; 
2. кафедраи иқтисодиёти ҷаҳонӣ ; 
3. кафедраи фаъолияти гумрукӣ . 

Роҳбарии кафедраи муносибатҳои молиявӣ-қарзии байналхалқиро номзади илмҳои иқтисодӣ, дотсент Убайдуллоев Фаридулло Каримович, кафедраи иқтисодиёти ҷаҳониро номзади илмҳои иқтисодӣ, дотсент Шарипов Садриддин ва кафедраи фаъолияти гумрукиро номзади илмҳои иқтисодӣ, дотсент Давлатов Хуршед ба ӯҳда доранд. 

Ба сохтори факултети муносибатҳои иқтисодии байналмилалӣ Шӯрои олимони факултет, Шӯрои илмӣ-методии факултет, эдвайзерони факултет оид ба таълим, тарбия, муовини декан оид ба илм ва робитаҳои байналмилалӣ,Офис-бақайдгиранда иттифоқи касаба, коргузор, кафедраҳо, инчунин созмонҳои ҷамъиятии факултет дохил мешаванд. 

Вазифаи асосии факултети муносибатҳои иқтисодии байналмилалӣ ин  тайёр намудани кадрҳои баландихтисоси ҷавобгу ба талаботи бозори меҳнати дохил ва хориҷ ба шумор рафта, ҷараёни таълиму тарбия, дар шуъбаи  рӯзонаи факултет ба воситаи айёниятҳои муосири таълимӣ ва камераҳои мушоҳидавии замонавӣ назорат карда мешавад. 

Бо таълиму тарбияи донишҷӯён устодони варзида, аз ҷумла 3 нафар профессорон, докторони илм, 13 нафар дотсентон, номзадҳои илм,  12 нафар муаллимони калон ва 20 нафар ассистентон машғул мебошанд. Бояд қайд кард, ки факултети муносибатҳои иқтисодии байналмилалӣ бо устодони унвондор ба ҳиссаи 42,4% таъмин карда шудааст. Аз ҷумла кафедраи муносибатҳои молиявӣ-қарзии байналхалқӣ 30%, кафедраи иқтисодиёти ҷаҳон ва тиҷорати байналмилалӣ 32% ва кафедраи фаъолияти гумрукӣ 30% бо устодони унвондор таъмин мебошанд. 

Дар факултети муносибатҳои иқтисодии байналмилалӣ дар шароити имруза аз рӯи ихтисосҳои зерин, аз ҷумла: ихтисоси 1-25010407 - молия ва қарз дар фаъолияти иқтисодиёти беруна, 1-960101 - хадамоти гумрукӣ, 1-250103 - иқтисодиёти ҷаҳонӣ, 1-25010305 - инвеститсияи байналмилалӣ, 1-96010102 - таъминоти иқтисодии фаъолияти гумрукӣ, 1-96010103-бехатарии иқтисодӣ, 1-26020202 - менеҷменти байналхалқӣ, 1-26020210 - менеҷмент дар соҳаи сайёҳии байналмилалӣ дар гурӯҳҳои буҷавӣ ва шартномавӣ, дар шӯъбаи рӯзона  мутахассисонро барои соҳаҳои гуногуни иқтисодиёт бо дараҷаи олӣ-бакалавр тайёр менамояд. 

Бояд қайд намуд, ки дар факултет 892 нафар донишҷӯ таҳсил менамояд. Дар шӯъбаи  рӯзонаи низоми таҳсили кредитӣ 41 гурӯҳи академӣ, мавҷуд мебошад. Мавриди қайд аст, ки дар ихтисосҳои ба факултет вобаста карда шуда, донишҷӯёни хориҷӣ низ таҳсил менамоянд.

Корҳои илмӣ-тадқиқотӣ дар муасиссаҳои таҳсилоти олии касбӣ ҷузъи ҷудонашавандаи он мебошад. Дар факултети муносибатҳои иқтисодии байналмилалӣ корҳои илмӣ-тадқиқотӣ дар асоси мавзӯи умумии «Самтҳои асосӣ ва ҳамгироии иқтисодиёти Тоҷикистон дар хоҷагии ҷаҳонӣ» ба роҳ монда шуда, аз се қисмат иборат мебошад, аз ҷумла: - Масъалаҳои методологии рушди муносибатҳои молиявӣ-қарзии байналхалқӣ дар ҳамгироии иқтисодӣ; -Дурнамои инкишофи фаъолияти иқтисодии хориҷии Ҷумҳурии Тоҷикистон; - Асосҳои методии танзими давлатии иқтисод иборат мебошад. Дар факултет Шӯрои олимон ва муҳаққиқони ҷавон ташкил карда шудааст, ки онҳо аз рӯи нақшаи корӣ ҷамъ шуда, масъалаҳои рӯзмарраи соҳаи иқтисодиётро мутолеа менамоянд. Инчунин дар факултет Зермаҳфили «Зеҳн» таҳти роҳбарии декани факултет Убайдов Ф.С. фаъолият менамояд, ки котибии онро муовини декан оид ба илм ва робитаҳои байналмилалӣ Шарифзода Г. бар ӯҳда дорад. Дар назди кафедраҳои тахассусии факултет маҳфилҳои илмии донишҷӯён, аз қабили «Бизнеси байналхалқӣ», «Гумрукчии ҷавон», «Молиячиёни ҷавони байналхалқӣ» фаъолият менамоянд. Дар факултет ба созмонҳои донишҷӯён диққати ҷиддӣ зоҳир карда шуда, донишҷӯён берун аз дарс ба корҳои ҷамъиятӣ сафарбар карда мешаванд. Бештар донишҷӯён бо корҳои ҷамъиятӣ дар созмони ҷавонон, шӯрои сардорон, шӯрои бонувон, созмони иттифоқи касабаи донишҷӯён, қисми фарҳанг ва варзиш машғул мебошанд, ки роҳбарии бевоситаи ин созмонҳоро аз зумраи донишҷӯёни аълохон ва фаъол ба ӯҳда доранд. Дар самаранок фаъолият намудани созмонҳои номбурда бештар заҳмати Шӯрои кураторон хело ҳам назаррас аст. 

Мавриди қайд аст, ки дар факултети муносибатҳои иқтисодии байналмилалӣ таҳсил дар ихтисосҳои иқтисодиёти ҷаҳонӣ бо забони англисӣ, хадамоти гумрукӣ бо забони русӣ, молия ва қарз дар фаъолияти иқтисодиёти беруна бо забони русӣ гурӯҳҳои академӣ таъсис дода шудааст, ки ҳамаи фанҳои тахассусӣ ва ғайритахассусӣ онҳо пурра бо забони англисӣ ва русӣ фаро гирифта мешаванд. 

Бо ташаббуси бевоситаи Ректори Донишгоҳи давлатии молия ва иқтисоди Тоҷикистон, дар асоси шартномаи мубодилаи донишҷӯ донишҷӯёни факултети муносибатҳои иқтисодии байналмилалӣ имкон доранд дар донишгоҳу донишкадаҳои пешрафтаи сатҳи ҷаҳонӣ, ки бо донишгоҳ шартномаи ҳамкорӣ доранд таҳсил намоянд.