Рӯзи Ғалаба яке аз санаҳои муҳиму пурифтихор дар таърихи халқҳои пасошӯравӣ ба ҳисоб меравад. Ин рӯз рамзи пирӯзии адолат бар зулм, шуҷоат бар тарс ва ваҳдати мардум бар душман мебошад. Аммо имрӯз, бо гузашти солҳо, саволе ба миён меояд: мо 9 майро танҳо ҳамчун як иди таърихӣ таҷлил мекунем ё аз он сабақ низ мегирем?

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон таъкид намудаанд: «Мо ҳамеша бояд корномаи қаҳрамонони ҷангро гиромӣ дорем, зеро маҳз бо ҷоннисориҳои онҳо сулҳу оромӣ ва зиндагии осоишта барои наслҳои имрӯз таъмин гардид». Ин суханон аҳамияти бузурги ҳифзи хотираи таърихӣ ва эҳтиром ба қаҳрамононро боз ҳам равшан месозанд.

Аввалан, бояд таъкид кард, ки 9 май на танҳо хотираи ҷанг аст, балки ёдбуди қурбониҳои бераҳмонаи инсонҳост. Миллионҳо нафар ҷони худро барои ҳифзи Ватан, озодӣ ва ояндаи наслҳои баъдӣ фидо карданд. Ин қурбонӣ набояд танҳо дар суханҳо боқӣ монад, он бояд дар амал, дар рафтори ҳаррӯзаи мо ёдоварӣ ва арҷгузорӣ шавад.

Дуюм, имрӯз аҳамияти сулҳ бештар аз ҳар вақти дигар эҳсос мешавад. Ҷаҳон ҳанӯз ҳам аз муноқишаҳо ва низоъҳо холӣ нест. Аз ин рӯ, 9 май бояд моро водор созад, ки арзиши сулҳ, ҳамдигарфаҳмӣ ва таҳаммулпазириро бештар дарк намоем. Пешвои миллат Эмомалӣ Раҳмон борҳо таъкид кардаанд, ки «сулҳ ва субот неъмати бебаҳо буда, ҳифзи он вазифаи муқаддаси ҳар як шаҳрванд аст». Пирӯзии воқеӣ танҳо дар майдони ҷанг нест, балки дар нигоҳ доштани сулҳ ва пешгирии ҷангҳо мебошад.

Сеюм, масъулияти насли ҷавон дар нигоҳ доштани хотираи таърих хеле бузург аст. Агар мо таърихро фаромӯш кунем, хатари такрори он зиёд мешавад. Чунонки Пешвои миллат Эмомалӣ Раҳмон иброз доштаанд: «Ҷавонон бояд бо ҳисси баланди ватандӯстӣ, худшиносии миллӣ ва эҳтиром ба таърих ба воя расанд».

Дар фарҷом, бояд дарк намоем, ки 9 май на танҳо рӯзи таҷлил, балки рӯзи андеша ва худшиносӣ аст. Ин сана моро ба суолҳои муҳим рӯ ба рӯ мекунад: оё мо арзишҳое, ки барои онҳо ҷоннисориҳо шудаанд, қадр мекунем? Оё мо барои ҳифзи сулҳ ва субот саҳми худро мегузорем?

Аз ин лиҳоз, омӯзиши воқеаҳои гузашта, эҳтиром ба собиқадорон ва нигоҳдории арзишҳои миллӣ вазифаи ҳар як шаҳрванд аст.

 

Фахриддин ШАМСОВ -

ассистенти кафедраи

информатикаи амалӣ дар иқтисодиёт