Таърихи кафедраи идораи давлатӣ ва маҳаллӣ

Кафедраи идораи давлатӣ ва маҳаллӣ дар асоси фармоиши ректори Донишгоҳи давлатии молия ва иқтисоди Тоҷикистон «Дар бораи ташкил намудани кафедраҳо дар зерсохторҳои таркибии факултетҳо ва мансубнамоии равияву ихтисосҳо ба он» аз 7 июли соли 2025, №90/11-а дар сохтори факултети иқтисод ва идоракунии давлатӣ таъсис дода шудааст.

Таъсиси кафедра ба талаботи рушди низоми идоракунии давлатӣ, такмили сиёсати давлатии иқтисодӣ ва омодасозии мутахассисони баландихтисос барои мақомоти давлатӣ ва маҳаллӣ мутобиқ буда, ҳамчун яке аз бахшҳои муҳими таълимӣ-илмии факултет фаъолияти худро ба роҳ мондааст.

Дар асоси фармоиши мазкур ба кафедраи идораи давлатӣ ва маҳаллӣ омода намудани мутахассисон аз рӯйи ихтисосҳои зерин вогузор гардидааст:

1. 1-260101 – Идораи давлатӣ;
2. 1-26010301 – Танзими давлатии иқтисоди миллӣ;
3. 1-26010101 – Идораи мақомоти маҳаллӣ.

Кафедраи идораи давлатӣ ва маҳаллӣ ҳамчун ҷузъи таркибии факултети иқтисод ва идоракунии давлатӣ дар ҷараёни омодасозии мутахассисони касбӣ дар соҳаҳои идораи давлатӣ, танзими давлатии иқтисоди миллӣ ва идораи мақомоти маҳаллӣ саҳми назаррас дорад. Фаъолияти кафедра ба ташаккули дониш, малака ва салоҳиятҳои касбии донишҷӯён равона гардида, ба талаботи бозори меҳнати муосир ҷавобгӯ мебошад.

Фаъолияти кафедра дар самтҳои таълимӣ, таълимию методӣ, илмӣ-тадқиқотӣ, робитаҳои байналмилалӣ ва тарбиявӣ мутобиқи нақшаҳои тасдиқгардида ва талаботи оиннома ва дастурамалҳои Донишгоҳ ба роҳ монда шуда, мунтазам амалӣ мегардад. Кафедра ба масъалаи баланд бардоштани сифати таълим, истифодаи усулҳои муосири омӯзиш ва мутобиқсозии барномаҳои таълимӣ ба талаботи замони муосир аҳаммияти аввалиндараҷа медиҳад.

Дар фаъолияти худ кафедра тайёр намудани мутахассисони рақобатпазир, соҳибихтисос ва дорои тафаккури идоракунии муосирро ҳадафи асосӣ қарор дода, масъалаи мутобиқати сатҳи омодагии хатмкунандагонро ба талаботи бозори меҳнат дар мадди аввал мегузорад.

Айни ҳол дар кафедраи идораи давлатӣ ва маҳаллӣ 8 нафар кормандон фаъолият менамоянд, ки аз онҳо 5 нафар омӯзгори доимӣ, 2 нафар ҳамкори дохилӣ ва 1 нафар корманди техникӣ мебошанд. Аз ҷумла, дар ҳайати кафедра 1 нафар номзади илмҳои иқтисодӣ, дотсент, 1 нафар номзади илмҳои иқтисодӣ, муаллими калон ва 5 нафар ассистент фаъолият дошта, бо масъулияти баланд ба таълим ва тарбияи донишҷӯён машғул мебошанд.

Кормандони кафедра дар баробари фаъолияти таълимӣ дар корҳои илмӣ-тадқиқотӣ, таҳияи маводи таълимӣ, иштирок дар конфронсҳои илмӣ ва ҳамкориҳои академӣ фаъолона саҳм мегузоранд, ки ин ба рушди минбаъдаи кафедра ва баланд бардоштани нуфузи Донишгоҳ мусоидат менамояд.